font-help

এই পোস্টটি 1,018 বার দেখা হয়েছে

বিজোগর নূয়া মাজারা। প্রবীর তালুকদার চাঙমা

গৌহাটির এস পি তালুকদারর কধাধগে ভালক আঝার বঝর আগেন্তুন ধরি এশিয়া মহাদেঝর মধ্যভাগ বা মঙ্গোলীয়া দেঝন্তুন সিটিয়ানস নাঙে ইক্কুয়া জাত সীল্ক রুট (গোবি মরুভুমির অঞ্চল) ধরিনেই পশ্চিমে এধাক। তারা ব্যাবসা গরিবার নাঙে সেক্কেদিনর জম্বুদীপ বা ভারদভূমিত লুঙি বজত্তি গরন্দি। তারা আফগানিস্থান, ইরান ইরাক সং লুঙি সিদুইঅ বজত্তি গরন্দোই ভিলি উদো পা যিয়ে। পরে হালে এই সিটিয়ানস জাত্তুয়াই আরঅ ইক্কুনু দিনর নেপাল বা হিমালয়র হায়কুরে নানা চিগোনচাগোন দেঝত ছিদাছিত্যা অই যান।

সিন্ধু বা হিন্দু, পরেকালে ইন্দো। এ জান্তুনরে চিন দিলাক ইন্দো সিটিয়ানস নাঙে। এই ইন্দোসিটিয়ানস গোষ্ঠীর মানুচ্চুনই অলাক্কে শাক্য জাদর আদি পুরুষ। সেনত্যে শাক্য জাত হলেইয়ে মানুচ ইচ্যা ইরান ইরাগদুয়া আঘন। আঘন তিব্বদত, নেপালত এমেন কি দগিন ভারদতওয়া শাক্য জাদর মানুষ আঘন ভিলি মেদ পা যায়। আঝার বঝরঅ ভিদিরে দেজে দেঝে নানান জাত্যোই মিলিঝুলি থাক্কে থাক্কে সিটিয়ানউনর বদলি যিয়ে ধর্ম, হিয়া রং, হদা বাত্তা, চলনফিরন। সে ইঝেবে শাক্য জাত হলেইয়া আমা হুদুম্বউন ছরি আঘন নেপাল, ইরান ইরাক, ভারত, তিব্বত, ভুটান, আসাম, থাইল্যান্ড বার্মা আ বাংলাদেজর কনায় ঘনায়।  আ আমি চাঙমাউন হলেই সেই শাক্য জাদর অংশবংশ ভিলি।

নানা জাদর বিজোগ ঘাদি মেদ পা যায়-এশিয়া মহাদেঝত বিশেষ গোরি ফরাসী দেঝর মানুচ্চুনে সিটিয়ানস নাঙর মানুচ্চুনরে সাকা জাতি ইঝেবে চিনিদাক। পয়নাঙী বিজোগঅ বইয়ত লেগা আগে দণি এশিয়ার ইন্দোসিটিয়ানস জাত্তুন সাকা নাঙেই পরিচিত। এই সাকা জাত্তুয়ার আঘে। বেগিদো বিজোগর গ্রন্থ, যেমন-পুরানা, মনুস্মৃতি, রামায়ন, মহাভারত, পাটানঞ্চলী। শাকা জাত্তুয়া নাকি অমহত্যে দুদর্ষ জাত। কিন্তু এ জাদঅ ভিদিরেন্তুনই মহামানব গৌতম বুদ্ধর জন্ম। গৌতম বুদ্ধরে শাক্যমুনি বা শাক্যসিংহ বা হনো হনো সময় শাক্য মং নাঙেই চিনিদাক। সেই শাক্য জাদর মং হি শাক্যমং? যা পরেহালে চাকমং বা চাকমা?

ইচ্যা পিত্থিমীর তিনান দেঝ-বার্মা, বাংলাদেশ আ ভারদর নানা জাগাত ছিদি পইয্যেই চাঙমা জাত্তুয়া। চাঙমাউন কুন্তুন এলাক ? বিজোগত লেগা আঘে একদিন চাঙমাউনর স্বাধীন রেজ্যো এল’। এল’ চাঙমা রেজ্যোর রাজধানী কলাপ নগর। বেগিদো পরে আরেক চাঙমা রাজায় গরি তুলে তার রাজধানী চম্পকনগর। মাত্তর কুদু সেই ফেলেই এইচ্যা চম্পকনগর ? বিজোগোর পাগোর আহ্দেইনে বিজোগ লেগিয়েউনে তোগেই সুপ ন পাদন তার কনঅ মাজারা। গৌতম বুদ্ধ যে জাদত জনম লোইয়ে সেই শাক্য জাদর বংশ হলেইয়া চাঙমাউনর বিজোগর মাজারা তোগেই পানা আমার দরকার। এই শাক্য জাত্তুয়া মাজারা কেঙেরি লুগেল? শাক্যউন নাকি অমহত্যা বারবো জাত এলাক। অন্য জাদত তারা মিলা বৌইঅ ন দিদাক, অন্য জাদন্তুন বৌইঅ ন আনিদাক। তারার লো সমারে অন্য জাদর লো মিজোক সিয়ান তারা ন চেদাক। তারা জাত্তুয়া অসিজি ন অয় পা তারা-তারা কুদুমে কুদুমে লোলি গত্তাক। শাক্য জাদন্তুন সিদ্ধার্থ বুদ্ধত্ব লাভ গরানায় চেরোকিত্যে নাঙ ফুদি যায়।

সেক্কে দিনত কৌশল রাজা প্রসেনজিদে শাক্য বংশর মিলা লবার চেলে শাক্যউনে তারে ঠগেই মহানাম শাক্যের নাগমুন্ডা নাঙে এক চাগরানীর পেদর জারবো ঝি বাসবত্রিয়ারে শাক্য রাজ কন্যা সাজেই বৌ দ্যান । সেই বাসবত্রিয়ার পুয়া অলদে বিরুঢ়ক (বিদুত্থবা)। ডাঙর অই বিরুঢ়গে খবর পায় তা বাব প্রসেনজিদরে শাক্যউনে ঠগেই দাসীমিলা বৌ দ্যন । তা মা বাসবত্রিয়া অলদে সেই দাসী মিলা । বিরুঢ়গরে কপিলাবস্তু রেরা গেলে যাদে শাক্যউনর কারর সালাম গরা ন পরে সেনদ্যে তার হনেট (বয়জে চিগোন) বেগ গুরোউন সরেই থুইয়ন । জারবূয়া মিলার পূয়া বিরুঢ়গে তার মইল্যা ঘরত বেরা গেলে শাক্যউনর গুরোউনর সালাম খেই পেলে শাক্য জাদর মান যেব মনে গরি এ বুদ্ধি গরা অয় ভিলি বিজোগত লেঘা আঘে। সেধগে বিরুঢ়গে কপিলাবস্তু বেরা গেলে বেক্কুনরে সালাম গরি পায় । তারে সালাম গরিবার মত কন গুরো হুদুম তে লাগত ন পায় । তার বাপ প্রসেনজিদরে চাগরাণী ঝি বৌ দেনা আর তারে অগমান গরানার ঘটনা পরেও তে মেদ পায় । শাক্যউনর এই কেরামতি বিরুঢ়গে অজম গরি ন পারি যেরেদি শাক্যউনরে হাবি ইল মারেইয়ে। নেপালর সাগর হাওয়া নাঙে সে জাগান এব সং আগে যে জাগাত বিরুঢ়গে শাক্যউনরে আজারে আজারে কাপ্যে। বুদ্ধ নিজে দ্বিবার শাক্যউনরে বিরুঢ়গর আহদন্তুন বাজেবার চিয়ে । যেরেদি দেগেদে তারার কর্মফল ভোগ গরা পরিব। কাবা খেই যে যিন্দি পরান বাজেই পারে তে সিন্দি ধেই যিয়ন শাক্যউন । সেই শাক্যউনর একদল ব্রম্মপুত্র গাঙ সং বর্তমান আসামত লুঙন্দি । ভালকবঝর থেই মনিপুর আ বার্মার সীমান্তত কুবোভ্যালী নাঙে এক জাগাত বজস্তি গরনদৈ। বর্তমান মনিপুরর মোরে আ বার্মা সীমানা ধগে বিরাট রেজ্যো এল এই কুবোভ্যালী । ১২ শ শতাাব্দির পর শদহানেক বঝর ধুরি এ চাগালাত এলাক শদে শদে বুদ্ধমন্দির। এই সাক্য জাদর মানুচ্চুনই চাঙমা জাদর পূর্বপুরুষ এলাক ভিলি কিয়েচ গরা অয় । আর আমার চাঙমা বিজোগত সে কধাই লেগা আঘে যে আমি পরেহালে দগিন মুখ্যা যাদে যাদে আরাকান সং লুঙিগৈ। একদাগিয়ে হন্দে আমি চাঙমাউন কালাবাগা রেজ্যোন্দি গুরি আরাকান যিয়েই । আরকদাগি কন্দে আমি নাহি বার্মার পেগু বা পাগান রেজ্যোত লুগি সিত্তুনই দগিন মুখ্যা যুদ্ধ গত্তে গত্তে বা ধেই পলে যাদে যাদে আরাকান লুঙিগৈ । মাত্তর অই পারে আমার দ্বিবা দলে দ্বি হিত্যেন্দি লামন্যা যাদে যাদে শেষমেষ একদলে বার্মার আরাকান বা রোয়াঙ রেজ্যোত লুঙিগৈ । সিন্তুনই আরঅ চাদিগাঙ, হিল চাদিগাঙ উজেইগি ।

আরেকদাগি বিজোগ লেগিয়েই বিশ্বেচ গরন, বুদ্ধ জন্মরও হয়েক শত বজর আঘে হিমালয়র হায় কলাপ বা কল্প নগর নাঙে এক্কান রেজ্যো এল’। এ রেজ্যোর রাজা এল’ অভিরথ। রাজা অভিরথের বংশর মধ্যে অপুর নাঙে এক রাজায় সে দেচ্চানত শাসন গত্ত। সেই অপুরর পুয়া নিপুর, নিপুরর পুয়া করকশুক, করকশুগর পুয়া উল্কামুখ, উল্কামুগর পুয়া হস্তীক, হস্তীগর পুয়া অলদে সিংহহনু। সিংহহনুর চেরবুয়া পুয়ার মধ্যে রাজা শুদ্ধোধন একজন। আমি কই পারি শুদ্ধোধনে কপিলাবস্তু নগরর রাজা এল। গৌতম বুদ্ধ অলদে এই সেই শুদ্ধোধনর পুয়া। সে লে দণ্ডপানি নাঙেইঅ আরঅ এক রাজা এল। তারাইঅ শাক্য জাত। শুদ্ধোধনর পুয়া সিদ্ধার্থ, সিদ্ধার্থর পুয়া রাহূল ভিু অহ্নেই তারার ঢেলাবুয়া থুম অয় ।

বিরুঢ়গন্তুন কাবা খেই ধে পলে যাদে যাদে শাক্য বংশর একদাগি কপিলাবস্তু বা শাক্য রেজ্যোর পুগে আরক্কান নূয়া কলাপনগর রেজ্যো গরি তুলন্দৈ। বংশ পরম্পরায় একদিন শাক্য নাঙে কলাপনগরর এক রাজা এল’। তার পুয়ার নাং এল’ সুধন্য । সুধন্য রাজার দ্বিবা রাণী এলাক। ডাঙর রাণীর পুয়া অলদে গুনোধন। চিগোন রাণীর দ্বিবা পুয়া-আনন্দ মোহন আ লাঙ্গলধন। গুনধনে ধ্যানসাধনা গত্ত । যেরেদি তে সন্যাসী অই যোগসিদ্ধি লাভ গরি মুক্তি লাভ গরে ।

সুধন্য রাজা মরি যানার পরেদি লাঙ্গলধনে কলাপ রেজ্যের রাজা অয়। তেইঅ বুদ্ধধর্মর ভক্ত অই গমে দালে রাজ্যত দভাকাদি ভঙেই একদিন মরি যায়। লাঙ্গলধনর পুয়া তজিন-তজিনর পুয়া সমুদ্রজিত। সমুদ্রজিদর পুয়া চিগোনঅ অক্তত মরি যানায় তেইয় মনত দুগে সন্যাসী অই রাজ্যভার মন্ত্রী শ্যামলঅ উগুরে ছারি দে। এই শ্যামলে পরেকালে হিমালয়র উগুরেন্তুন সং জাগাত লামি এই যুদো রেজ্যো গরি তুলেগি। শ্যামলর পুয়া চম্পকলি। তেইঅ রাজা অই গমেদালে রাজত্ব চালেই যায়। তা আমলদ রাজধানী বানা অইয়ে পত্থম চম্পকনগর। এই চম্পকনগরান গঙ্গানদীর পূগ ঢাগত বিলি কিয়াচ গরা অয় ।

চম্পকলির পুয়া সাধেংগিরি। এই শাক্য রাজা মায় সাধেংগিরি অমহত্য নাঙকরা রাজা এল। জ্ঞানে গুনে ভজমান নাঙ এল’ এই সাধেংগিরি রাজার। তারেলোই চাঙমাউনর এক্কান পজ্জন আগে-রাজা সাধেংগিরির পজ্জন। সাধেংগিরি রাজার স্বর্গলাভ নাঙেই নাটক ভাঙিদাক চাঙমাউনে। বিজোগর মাজারা ধগে-একদিন রাজা সাধেংগিরি রাণীরে এক শিগারীন্তুন ইক্কুয়া সুক পেইক কিনি দে। রাণী সে সুখ পেইক্কুয়র জোড়া তালাস গরিবাত্যে রাজারে হোজোলী গরে। রাজা ভালকবার শিগারী পাদেই ঝারত সে সুখ পেইগর জোরাবুয়া তগা বাজেই দে। শেষমেষ রাজা নিজেই ঝারত যায় সে সুখ পেইগর জোরা তগা। ঝারত ঘুত্তে ঘুত্তে তে তা মানুচ্চন্তুন ফারক অই আবাদা গরি ঝারঅ ভিদিরে এক ধ্যানমগ্ন সন্যাসী লাঘত পায়। রাজায় সন্যাসীবুয়ান্তুন নানা বিষয়ে জ্ঞান অর্জন গরি ছ মাস পরে রাজঘরত ফিরি যায়। রাজধানীত ফিরি রাজায় প্রজাউনরে ধর্ম্মকর্ম গরিবার কোজোলী গরে। তেইয় ধর্ম্মকর্ম শিা দে।

রাজার পুয়া ধর্ম্মসুখ ডাঙরডিঙোর অলে রাজা তারে রাজত্ব গজেই দি ঝারত যায় ধ্যান সাধনা গরিবার উদিজে। যাদে প্রজা আ তা পুয়াবুয়ারে কই যায় বার বঝর বাদে তারে যেন তগান্দই। বার বঝর পার অলে একদিন ধর্ম্মসুগে মানুচজন সমারে তা বাবঅ কধাধগে ঝারত তগা যায়। ঝারত যেনেই তারা দেগন্দে চেরবুয়া বটগাজঅ মাধাত মাগরগঅ জ্বালঅ ধগ এক্কান চালে রাজারে ছাবা দি আঘে। সে ছাবাতলে রাজা এক্কান চৌগিত মরি পরি আঘে। তা চেরোকিত্যে নানা বাবদর পেক, বান্দর, য়েদ পাক খাদন। সেই সনালোই বেরেইয়া চৌগিত বাবদা উরের আ আগুনজ্বলের। সন্জুক বাশী আ নানা বাবাদর বাদ্যযন্ত্রর র শুনো যার। বেক্কুনে দেগিলাক রাজার চিতাবুয়া আগাজ উগুরে উধা ধল্য। উগুরে উত্তে উত্তে লারে গরি আগাজত মিলেই গেল। সে ধগেই ইচ্যা চাঙমাউনে মরি গেলে রুবো উরর চেরহিত্যে চেরবুয়া বাজ দি তাঙগোন কানি তাঙেই দ্যান।

সাধেংগিরি রাজার পুয়া সৈঙ্গাসুর তা বাবে মরি যানার যেরে রাজা অয়। তেইয় গমে রাজ্য শাসন গরি যায়। তার দ্বিবা পুয়া- ১) ধর্ম্মাসুর, ২) চম্পাসুর। ধর্ম্মাসুরে ধার্মিক এল’। তে বৌদ্ধ সন্যাসী অই সংসার ত্যাগ গরে। তা গুরো ভেই চম্পাসুরে রাজা অয়। চম্পাসুরর তিন্নুয়া পুয়া-১) সমেসুর, ২) দেহসুর বা দেবসুর, ৩) বিম্বাসুর। চম্পাসুরর পর সমেসুরে রাজা অয়। বিম্বাসুরে বিদ্যাশিার উদিজে মগদ রেজ্যোত পরং অয়গি। সমেসুরর পুয়া ভীমঞ্জয়। এই ভীমঞ্জয়র কালাবাঘা নাঙে এক সেনাপতি এল’। কালাবাগা পরেদি রাজ্য জয় গরা এযে তারান্তুন পুগেদগিনে। তে সে নুয়া রেজ্যোর নাঙ দে হালাবাঘা আ রাজধানীর নাঙ রাগায় চম্পকনগর।

রাজা ভীমঞ্জয়র পুয়া সাংবুদ্ধা রাজা অয় তা বাব মরি যানার পরে । সাংবুদ্ধার দ্বিবা পুয়া-১) বিজয়গিরি, ২) উদয়গিরি। কালাবাঘা মরি গেলে রাজা ভীমঞ্জয় তা ডাঙর পুয়া বিজয়গিরিরে কালাবাঘা রেজ্যো শাসন গরা দি পাদায়। সে ল্েয রোয়াং রাজা (আরাকান) আ তার মগ সৈন্যউনর জ্বালায় থরি ন পারি বিজয়গিরি রোয়াং রেজ্যো ঝাবায়গৈ। তিবিরা রেজ্যোর রাজার অবস্থাইঅ সুবিধের ন এল’। তা রেজ্যোত এনেইঅ মগ সৈন্যউনে লুঠপাত, অত্যাচার চালেদাক। তে বিজয়গিরি তিবিরা রাজারে কই পাদেই দেঘা গরে আ মগ দঙেবার তেম্মাং গরে। বিজয়গিরি রাজ্য জয় গরি মগ সৈন্যউনরে ধাবেই দে। তিবিরা রাজালোই তার বেগিদো উধাবজা এল’। সেলে গোমতী গাঙঅ পারত গাদাগাগি নাঙর মুরোত পাত্থরঅ উগুরে দ্বি রাজার মুর্তি বানেইঅন বিলি শুনো যায়। বিজয়গিরি সেনাপতি এল’ রাধামন। আরাকান আক্রমন গরিবাত্যে রাধামনরে তিবিরা রাজা হৈ চৈ নাঙে একদল সৈন্য বলদিবার উদিজে দে।

ইন্দি বাঙ্গালার রাজা আ জমিদারউনেইঅ সেক্কে চাঙমা বাহিনীরে বলাবল দ্যান ভিলি উদো পায় যায়। বিজয়গিরি বেগিদো সৈন্য সামন্তলোই দগিন মুখ্যা এই চাদিগাং লুঙিলে ইধাং নাঙে এক জাগাত মগ সৈন্যলোই উরুস্তুল যুদ্ধ বাজে। এ যুদ্ধত রোয়াং রাজারেইঅ অধেইদি বিজয়গিরি লারে লারে খ্যাং রেজ্যো, অক্সা রেজ্যো মেরোল গরি নেযায়। ফিরি এত্তে বিজয়গিরি পুগেদি কুকি রাজা কালঞ্জয়র রেজ্যোইঅ জয় গরে। ইন্দি সেনাপতি রাধামনেইঅ যুদ্ধ জয় গরি চাদিগাঙত ক্যাম্প বানি রাজা বিজয়গিরিরে খবর পাদায়। তিবিরা সেনাপতিইঅ রিয়াং দেশ মুরুং দেশ জয় গরে। বিজয়গিরি রাজ্য জয়র খবর শুনি কালাবাঘা রেজ্যোন্তুন চাদিগাঙ এযে। রাধামনে বিজয়গিরি রাজান্তুন অনুমতি লোনেই নুয়া চম্পকনগর ফিরি যায়। আর বিজয়গিরি কালাবাঘা রেজ্যোত ফিরি শুনেদে তা বাবে মরি যিয়ে। তা বাব সাংবুদ্ধা মরি যানার কারণে প্রজাউনে বিজয়গিরির চিগোন ভেই উদয়গিরিরে রাজা বানেইঅন। সে যেরে বিজয়গিরি পিরবর চাদিগাঙ ফিরি বজত্তি গরেগৈ। সেক্কে দিনত আরাকান রেজ্যোয়ান ডাঙর এল’। সাপ্রেইকুল বর্তমান লামা, কক্সবাজার, টেকনাফ গদা আরাকান রেজ্যোর ভিদিরে এল’।  সাপ্রেইকুল এব সং আঘে। এই সাপ্রেইকুলান চাকমাকুল ইজেবেইঅ চিন আঘে। বিজয়গিরি সৈন্যউনরে সিদুয়র মিলা বো লবার উহ্ঘুম দিল’। তেইয় এ রাজ্যত গমেদালে দভাকাদি ভঙেল। সেই বিজয়গিরির বংশ অলংগে আমি ইরুগর চাঙমাউন।

১৯৬৯ সালত দি ফার ইস্ট নাঙর ইক্কুয়া বইয়ত মারিয়া পেনকালা ম্যাপ আগেই দেগিয়ে

১০০ খ্রীষ্টাব্দর সময়ত নেপালর পজিমন্তুন একদল শাক্য দেশছাড়ি উত্তর বার্মাত বজত্তি গয্যন্দৈ। নাঙকরা তিব্বতী বিজোগ লেগিয়া লামা তারানাদে ১৬০৮ খৃীষ্টাব্দত হিস্ট্রি অব বুড্ডিজম ইন ইন্ডিয়া নাঙে ইক্কুয়া বইয়ত লেগি যিয়ে কুগি ভুমিত চাগমা নাঙে এক জাদ আঘন। সেক্কে দিনত আসাম, ত্রিপুরা ও বার্মার কিজু চাগালারে কুগিল্যান্ড কোয়া অদ।

কমলে কিঙিরি শাক্যউন আসাম, মনিপুর বা উত্তর বার্মাত লুঙিলাক্কৈ সে হদা জাদগরি কিয়োই কই ন পারন। মাত্তর এই আসাম বা ব্রম্মপুত্র ভ্যালিন্তুনই আমা চাঙমাউনর এক দাগি ভঙি ভঙি লুঙিগৈ আরাকান । আরাকান্তুন চাদিগাঙ । চাদিগাঙন্তুন হিল চাদিগাঙ। এন গত্তে গত্তে ইচ্যে মিজোরাম, তিবিরা রেজ্যো আসাম আ অরুনাচল পরঙ অই আরেইয়ে জাগাত নূয়াগরি বজত্তি গরিল্লৈ ।

গৌতম বুদ্ধর বংশ তালিকা তলবিচ গল্লে কিজু নাঙর মিল পা যায়। জয়সেন, সিংহহনু, সুপ্পাবুদ্ধা এ নাঙানী ভজান চিনপয্য মনে অয়। চাঙমা বিজোগ ঘাদিলে এ নাঙানী পায় যায়। আমি চাঙমাউন কি গেইচ্যে শাক্য জাদর অংশবংশ কিনা সে ব্যাপারে বৈজ্ঞানিক গবেষণা গরিবার এগেমে ২০০৩ সালত এক্কান আরকানি লো অয়। উইনিভার্সিটি কলেজ অব লন্ডনর বায়োলজী বিভাগর সিনিয়র লেকচারার ড: মার্ক জি. টমাস এ উদিজে কিজু কামওয়া আহ্দত লুইয়ে। বর্তমানে তারার প্রজেক্টর কাম মঅ অই আঘে। তবে একদিন এ গবেষণা কাম চলি যদি শাক্য জাদর উৎপত্তির বৈজ্ঞানিক প্রমাণ পা যায় সালেন আমা জাদত্যে ভজান উপকার অব । তারার ঠিকানা: Dr Mark Thomas (Senior Lecturer), Darwin Building, Department of Biology, University College London, 4 Stephenson Way, London, NW1 2HE. তারার ওয়েব সাইট অহলদে: http://www.ucl.ac.uk/tcga/. ড: মার্ক টমাসর ইমেল অহলদে: m.thomas@ucl.ac.uk

থুমেদি: চাঙমা বিজোগর উগুরে ইক্কুয়া প্রামাণ্য তথ্যচিত্র বানেবার এগেমে রেগা অবিজত বেগিদো তথ্য থুবো অইয়ে। এ পইদ্যানে ভারদর নানা জাগাত যেই চম্পকনগরর মাজারা তুলো পরিবো। যা পরিবো বার্মা, থাইল্যান্ড। এমেন কি লাওস কম্বোডিয়া সং যেই তগা পরিব আমা জাদর নানা বাবদর ভিডিও চিত্র। এ উদিজে অনিরুদ্ধ ২০ আহ্ঝার টেঙা বলাবল দের। আমার লাগিব ন ওল হলে হেট হত্তুর আহ্ঝার। কারর ধারোচ থেলে আমার সমার বুদি পারিবা।

ভ্রমণ কাহিনী

এই বিভাগের আরো পোস্ট

Tags: