font-help

এই পোস্টটি 1,216 বার দেখা হয়েছে

পাত্তরী মার মন কানে। মৃত্তিকা চাকমা

মৃত্তিকা চাকমা

পাত্তরী মার মন কানে

 

রাঙামাত্যা শহ্রান  ঘুর পাক খার

কুন্দি যেব’ কি গোরিব’ বানা মানুষ এত্তন যাদন-

ধাবা দেদন হনিজেস্যা, মুর খেই উঝত খাদন।

 

পাত্তরী মা আমক ওই রেনত আঘে বেদালাম নেই

ইয়দ থবো থুবো, দলা দলা, চাক চাক

কুধম ওই- আনে আনে কন,

কা কধা কন্না শুনের, পাত্তরী মা, মধনে শুনে।

 

বাঘেই আহ্ট গংরাম আগুন জ্বলের

খাগারাছরি লেভেই মানেই লক’ টারেঙে টারেঙে

বিজিদি গেলেই আহ্ধ থেঙ’ জনমর আদুর।

 

পাত্তরী মা’র  উভ অয়-

মুই কুধু; এই অতাল মানেই লক কুত্তুন?

পুঝর গরে এটারে  ওটারে, ইয়েন কুধু?

যার ওঝে তে কয় বনরূপ’  ইয়েন বনরূপ’

আ তুই কুত্তুন ? কুধু যর?

পাত্তরী মার মন কানে, আহ্ভিলেজ খায়

কবাল চাবারায় , অহ্রান  অয়

চোখ ঝবাত ঝবাত চেই থায় মানুষ্যুন।

 

পাত্তরী মা ইলেকট্রিক হাম্বাত মুরগুঝে

অক্ত অক্ত ধেক্কান উমুদো কারে-

ম’ ঝি  জামেই, পুও বৌ,  নাতিন পুদিন কেঝান আঘন

কোই উধে, চুগুনো বুক্কত বলহিজি চাবারায় –

আঁ পাত্তরী  বাপ-

সদরক ফুল বাগিজে গোরিবের এল’

দঘিন ধাগর শিঝে কুন্নত কলা  বাগিজে গোরিবের এল’

উত্তর ধাক্যা ইজোরান গোরিবের এল’

পুগ ধাক্যা সাঙুয়ান ফেলেই দিবের এল’

পজিম ধাক্যা কুরো অধক্কুন টাঙেবার এল’

কিচ্ছুই ন’ অল’।

আমা আমল থুম অল’

পুও  আমল গঙি যার

নাদিন’ আমলও আঝা নেই

পাত্তরী মা আহ্ভিলেজ খায় হাম্বাত আবুজে থুং থুং ধুজ খায়।

 

পাত্তরী মা আধুঘিলেত ভর দি  থিয়েই উধে

ফাদা ফাদা, গিরে  গিরে, ভূদিবো আহ্ধত  লয়

হুচ বারায়  লদক  ধদক

মানুষ যার আহ্লে তে

এক হুজ, দ্বি হুজ,  যার -যার –  উই  দুরত পাত্তরী মা যার।

 

বিদ্রঃ- এই লেখাটি ২০১০ ইং সালে বনযোগীছড়া কিশোর কিশোরী কল্যাণ সমিতি কর্তৃক প্রকাশিত স্ববন সংখ্যায় প্রকাশিত হয়।

 

এই বিভাগের আরো পোস্ট

Tags: